番茄馬蹄蝦仁

一向少煎炸，

來一次破例，

把蝦仁過油，

待蝦仁六分熟放馬蹄片過油，

30秒快手一齊撈起。

蝦仁過油前洗淨瀝乾，

用少許鹽醃，

沾上生粉後過油，

撈起備用。

蒜米起鑊，

加四湯匙番茄醬煮，

加入三個番茄（切粒）煮片刻，

放調味 ~ 片糖、鹽、醋、水，

蝦仁、馬蹄片回鑊！

小由在家中會碎碎唸.....

去嫲嫲度....

睇狐狸先生幾點鐘....

飲湯湯....

食酸咪咪....

蓮藕海參紅棗湯

蓮藕海參本來是燉甜湯，

執著性格總覺得怪怪地，

純個人問題，

唯有一湯兩吃，

燉好後才分兩份，

鹹、甜各有所好，

試味後甜湯比鹹湯更勝一籌！

蓮藕海參紅棗湯益血潤燥，

健脾補肝，

提高人體免疫力，

保護心肌、增強心臟功能，

降低血液黏稠，

降血脂，

海參高蛋白，

口感柔軟，

易消化，

適合長者小孩！

懶人版：

蓮藕一節，海參一條（發好），去核紅棗六粒

先將蓮藕、紅棗煲腍，

加入海參燉或煲約30-45分鐘，

提早15分鐘放冰糖。
如要鹹湯則在放糖前預留一半！

生煎煙肉薯餅

每次煎薯餅無論是生煎或熟薯茸煎，

都加入少許生粉，

第一次用北海道薯生磨，

瀝出薯汁後待沉澱，

取回濕粉拌入薯茸，

加入已爆香煙肉粒和蔥粒、少許鹽、胡椒粉，

中慢火煎，

這道便是最最簡單的生煎薯餅！

搞邊科

兩個石榴有乜搞作？

幾個蒜頭點解燒黑咗呢？

日前買咗三個石榴，

諗到要逐粒剝籽已唔願掂，

記起曾在網絡上看過用凍滾水浸著石榴剝籽，

哈哈！

真係快好多呢！

每次買蒜頭回來，

第一件事就係將蒜頭蒂燒黑，

呢個方法可防止蒜頭發芽！

剝完用凍滾水沖一沖食得！

靈芝雞骨草茶

買咗一大包雞骨草，

第一次用1/3煲紅棗無落片糖，

微甘微苦還可接受，

今日加靈芝桂圓，

都幾苦吓，

肯定清熱！

可以的話免得過都唔想落糖，

雞骨草清熱利濕，

舒肝解毒！

炒蠔爽

近日見蠔仔都幾肥美，

唔想煎蠔烙，

改為炒蠔爽，

兩者分別係蠔爽無鴨蛋，

用油較少，

已多年沒有在家吃蠔烙，

第一次試炒蠔爽尚算合格，

唯獨欠蔥粒和芫荽落得太早！

（又要食又怕芫荽多菌^^）

蠔仔與魚露、胡椒粉是最佳拍檔，

加上大量芫荽、蔥粒，

先將蠔仔快手飛水瀝乾備用，

用3湯匙地瓜粉、水、魚露、胡椒粉開粉漿，

加入蠔仔拌勻倒入鑊中兜炒，

加入芫荽、蔥粒，

上碟！

蠔爽配生菜包也不錯呢！